Nararamdaman ko pa rin ang hagupit ni milenyo, yung bagyo na tumama sa luzon dati, isang araw ng huwebes. Nag-iwan ito ng isang masidhing bakas. Sinira niya ang dalawa na pinakamamahal kong bilbords.

Yung una, ang bilbord ng boardwalk, northeast ng balintawak tolgate sa nlex. Naaalala ko pa, nakaupo man ako o nakatayo sa bus, sa may tatluhan o dalawahan, pauwi man sa bulacan o paluwas ng maynila, ay pipilitin ko pa ring matanaw ang bilbord ng boardwalk.

si vana, yung sa babae sa video ng tensionado. ang ganda niya talaga. Siya ang panggising ko sa umaga, dati, dahil sinira siya ni milenyo. Wala na siya, hindi ko na makikita.

Yung pangalawa, sa may overpass ng oliveros, yung wide bilbord ng smart.

Natutuwa ako dahil nandun din yung MMDA post station (kung ano man ang tawag dun). Kaya pinipilit kong maupo sa may dulo ng bus, sa may tatluhan, sa tabi ng bintana. Para kapag tumigil ang bus, ay eksakto sa harap ng bilbord ng smart.

Iniisip ko na sana ay nung bago pa tumama ang bagyo, sana pumunta na lang ako dun sa may overpass ng oliveros, na may dalang cutters. Kukunin ko yung bilbord dahil wala naman silang pakialam. Mahal ko ang bilbord na iyon.

Kahit ngayon ang tinitingala ko pa rin ang ang lugar kung saan ang dalawang bilbord na ito’y makikita. Umaasa pa rin ako na baka masulyapan kong muli ang kagandahan nila.

Oo nga pala, pinalitan na ng boardwalk yung bilbord nila. Hindi kapantay ni Jean Garcia si Vana.