Minsang makasakay ako sa harap ng isang up-pantranco dyip ay narinig ko ang sumusunod na mga pag-uusap.

driber0: Marami bang babalu sa ikot?
driber1: Hindi, wala nga eh.

driber0: Ganon?
driber1: …..

driber0: …..
driber1: Pero maraming kalbo.

driber0: Ah, marami ba?

Hindi ko alam kung ano ang ibig nilang sabihin sa mga babalu at kalbo pero nakasisiguro akong hindi nila pinag-uusapan ang mga mahahaba ang baba at mga walang buhok. Hindi nga lang ako sigurado kung ano ang talagang ibig sabihin nila.

Baka isa itong negatibong implikasyon ng pagkatao ng isang tao. ewan.

Sa pakikibaka sa pang araw-araw na suliranin, isang magandang kakayahan na matutunan ay ang pag-eestima ng masasakyang dyip.

Tamang Posisyon. Tumayo sa parte ng sakayan na pinakamalapit sa direksyon ng pinanggagalingan ng dyip, sa hanay ng maraming nag-aabang. Ngunit huwag manguna, tumayo sa pwesto na makikita ng maayos ang mga parating na dyip kahit malayo pa.

Maging alerto. Alamin ang ruta ng mga parating na dyip upang agad na malaman kung malapit na ang nais masakyan. Hulaan kung saan hihinto ang dyip at pumesto kaagad sa hulihan nito.

Mag-estima. Kung nagkamali sa paghuhula at marami nang nagkumpulang pasahero sa pinto ay suriing mabuti ang loob ng dyip. Marami pa bang mauupuan? Kung susugod din ba ako ay makakaupo rin ako? Isaulo ang mga tanong na ito bago umalis sa kinatatayuan.

Magmadali. Kung hindi ka pa makakasakay, baka abutan ka na ng dapit-hapon kaya maging agresibo. Makisiksik, manguna, makipagpulasan, at siguradong hindi ikaw ang matitirang nag-iisa sa sakayan.

parating na ang dapit-hapon
pakagat na ang dilim
palubog na ang araw ng umaga
pagmulat na ng mga bituin

patago na ang liwanag
sa likod ng gabi
wala na ang araw sa trono
buwan na ngayon ang maghahari

samahan mo ako ngayon
sa pagdadalamhati
hawakan mo aking kamay
at sabay nating suungin
ang kahabaan ng hatinggabi

makulimlim ang sinag ng buwan
sa kanlungan ng mga ulap
hinahagkan ng mahigpit
hanggang matapos ang pinapangarap.